Hevserokê HDP’ê ya Meletiyê Kemal Gedîk diyar kir ku AKP bi qeyyûman re dixwaze krîza ekonomîk veşêre.
Hevserokê HDP’ê ya Meletiyê Kemal Gedîk êrîşên dagirker ên li Bakur û Rojhilatê Sûriyeyê, desteserkirina şaredariyan û krîza ekonomîk a giran nirxand.
Gedîk diyar kir ku polîtîkayên bi qeyyûman parçeyekî konsepta şerê li dijî hilbijartina 7’ê Hezîranê ye û got ku “Ji gelan re dibêjin ku ‘Hûn nikarin bidin hilbijartin’ û ‘Hûn bi nasnameya xwe ya Kurdbûnê nikarin tiştekî bikin’ Em van tiştan red dikin.
Em ê siyaseta demokratîk bikin. Em ê astengiyên li pêşiya aştiya gelan rakin. Heta ku HDP li ser vê axê hebe, em ê dev ji siyaseta demokratîk bernedin. Em qeyyûman qebûl nakin. Qeyyûm tê wateya desteserkirina îradeya gelan. Em ê li hemberî van zext û zordariyan azadiyê pêk bînin.
Ew çi jî bikin em ê dev ji têkoşîna xwe bernedin. Em AKP’ê hişyar dikin. Tirkiye ber bi kaosê ve diçe. Dev ji van polîtîkayên xwe berdin. Bi qeyyûm û polîtîkayên şer re krîza ekonomîk nayê veşartin.”
Gedîk diyar kir ku desteserkirina şaredariyan û wezîfedarkirina qeyyûman faşîzm e û got ku “Li hemberî van pêkanînên antîdemokratîk em ê ji bo demokrasî û hiqûqê têbikoşin.”
Gedîk bal kişand ser vî tiştî ku hevserokatî ji bo wan xeta mor e û got ku “Em HDP nêrîna jinê ji xwe re dikin referans û em mafên jinan diparêzin. Ji ber vê jî em xwedî li destkeftiyên jina derdikevin. Pergalan hevserokatiyê ya HDP’ê ji hemû cîhanê re bûye mînak û ev pergal wê li cîhanê belav bibe.”
