Nivîskarê Tirk Semîh Edîz di gotareke xwe de ku ji aliyê malpera El-Monîtor a Amerîkayê ve hatiye weşandin, dibêje niha piştî ku hêrsbûna ji ber doza keşeyê Amerîkayê Andrew Brunson daket, guman hene ku Tirkiye û Amerîka dê ber bi başkirina têkiliyên xwe yên nakok ve biçin. Tevî vê yekê hê jî nakokiyên giran girêdayî gelek mijaran di navbera wan de hene û hêj nehatine çareserkirin.
Nivîskar wiha domand: “Li Bakurê Sûriyeyê ku Amerîka hevkariya Hêzên Sûriya Demokratîk (QSD) dike, Enqere ji ber vê mijarê gelekî bi hêrs bûye ku projeyeke wê ya berfirehkirina serweriya xwe li Bakurê Sûriyeyê heye.”
Li gorî nivîskarê Amerîkayê QSD weke hêzeke pêbawer nemaze li dijî çeteyên DAIŞ’ê û komên radîkal ên din di Sûriyeyê de dibîne. Nivîskar bal kişand ku Tirkiye nerazîbûnên Amerîkayê der barê êrîşa wê ya li dijî Efrînê de paşguh kirine.
Lêkolîner wiha dibêje: “Eger Enqere gefên xwe pêk bîne û derbasî şerekî berfireh li dijî QSD’ê li Bakurê Sûriyeyê bibe, dibe ku di encamê de di navbera artêşa Tirk û hêzên Amerîkayê de li herêmê şer derkeve.
Malpera El-Monîtor diyar dike ku Enqere ji vê yekê re ne amade ye, ji ber raporên ku dibêjin Amerîka hevkariya xwe bi Rêveberiya Xweser a Bakurê Sûriyeyê re kûrtir dike da ku hebûna xwe ya leşkerî li qadeke mezin a Sûriyeyê biçespîne. Li gorî agahiyên ji Washingtonê hatine wergirtin ew e ku Amerîka dixwaze di Sûriyeyê de bimîne da ku metirsiya ji ber Îranê sînordar bike.
El-Monîtor piştrast dike ku Enqere tevlihev bûye û ji vê têkiliya di navbera Washington û QSD’ê de ditirse û hewl dide bi hemû hêz û derfetên xwe vê girêdana di navbera wan de têk bibe. Lê guman berovajî vê kedê ne.
Wezîrê karên derve yê Amerîkayê Mike Pompeo di van demên dawîn de eşkere kir ku Amerîka naxwaze YPG’ê û QSD’ê wek hevkarên wê di Sûriyeyê de hilweşin, tevî ku Enqere vê yekê dixwaze. Pompeo wiha dibêje: “Em bi Kurdên Sûriyeyê re baş xebitîn û ew hevkarên gelekî baş bûn.”
El-Monîtor behsa gefên Erdogan ên êrîşa li dijî herêmên rojhilatê Firatê kir û diyar kir ku daxuyaniya wezîrê karên derve yê Rûsya Sergey Lavrov ku projeya Bakurê Sûriyeyê wek “xwecûdaker” bi nav dike, hişt Erdogan dijberiya xwe li dijî Kurdên Sûriyeyê zêde bike.
El-Monîtor diyar kir ku êrîşa Tirkiyeyê li dijî Kobanê piştî lûtkeya çaralî ya di navbera Rûsya, Tirkiye, Almanya û Fransayê de pêk hat û wiha got: “Erdogan ji vê boneyê sûd wergirt û careke din piştrast dike ku Enqere di projeya xwe ya dijberiya li Bakurê Sûriyeyê de bi israr e.”
Dîplomatekî dewleteke rojavayî ji El-Monîtorê re ku nexwest navê xwe eşkere bike, diyar kir ku Erdogan nikare şerê Amerîkayê bike tevî hemû hişyariyên wî yên nebaş der barê Bakurê Sûriyeyê de.
Nivîskar di dawiya gotara xwe de wiha dibêje: “Kesên bawer dikin ku derfeta vegerandina hevkariya stratejîk a Tirkiye û Amerîkayê di van mercan de pêkan e, gelekî hindik in.”
