EFRÎN – Çeteyên artêşa Tirk a dagirker li Efrînê piştî pere û zêrên jineke 80 salî dizîn, ew xeniqand.
Kiryar û hovîtiya artêşa Tirk a dagirker û çeteyên wê der barê gelê Efrînê de didomin. Li gorî çavkaniyeke herêmî ji Efrînê diyar kir ku çeteyên artêşa Tirk a dagirker şevê din bi ser mala welatiyê bi navê Nezmî Seyd Mihemed a li gundê Birc Ebdalo yê navçeya Şêrawa de girt û malbat bi kuştinê tehdîd kir.
Çavkanî destnîşan kir ku komeke çeteyan dema ku zarokên malbatê nehiştin ku çete mal û milkên wan bidizin, çeteyan ew girê dan û li wan xistin.
Her wiha çavkanî diyar kir ku çeteyan dayika Nezmî Seydo ya 80 salî girê da û hemû pere û zêrên wê dizîn, paşê jî ew xeniqandin heta ku jiyana xwe ji dest da.
Hêjayî bibîrxistinê ye ku artêşa Tirk a dagirker û çeteyên wê ji 18`ê Adara 2018`an ve zêdetirî 2 hezar û 500 sivîl revandine û çarenûsa 850 sivîlan ji wan heta niha ne diyar e.
