Endama Komîsyona Girtîgehan a ÎHD’ê Zelal Demîray diyar kir, girtiyên nexweş weke amûreke siyasî tên bikaranîn.
Endama Komîsyona Girtîgehan a ÎHD’ê Zelal Demîray diyar kir, ku girtiyên nexweş tenê di dema serlêdanên der barê wan an jî nûçeyên der barê mirina wan de dikevin rojevê û got, “Xuya ye dewlet bawer nake ku girtiyên nexweş nexweş in. Ji ber vê yekê gelek ji serlêdanên me red dikin. Piştî vê redkirinê jî agahî der barê mirina girtiyan tên, lê belê dewlet xwe qet ji vê yekê berpirsyar nabîne.”
Demîray bal kişand ser Mûhsîn Kizilkan ku li Girtîgeha Osmaniyeyê dema dawî jiyana xwe ji dest da û diyar kir, ku wan ji bo Kizilkan gelek caran serlêdan kirin lê belê bêencam hate hiştin.
Demîray anî ziman ku li gorî madeya 16’an a qanûna înfazê eger girtiyek ji ber nexweşiyê nikaribe bi tena serê xwe li girtîgehê bimîne divê ceza bê taloqkirin û got, “Nabe ku di vê mijarê de tenê saziyek biryarê werbigire. Nabe ku Saziya Tipa Edlî bi tena serê xwe biryarê werbigire. Em vê yekê her tim tînin ziman. Em dibêjin ku biryara xwe ya der barê girtiyekî nexweş dibe ku têrker nebe.”
Demîray diyar kir ku girtiyên nexweş ne xema dewletê ye û got, “Xuya ye dewlet bawer nake ku girtiyên nexweş nexweş in. Ji ber vê yekê piraniya serlêdanên me tên redkirin. Piştî redkirinê jî dema ku agahiyên der barê mirina girtiyan tê bihîstin dewlet xwe berpirsyar nabîne. Rewşa girtiyên nexweş roj bi roj giran dibe. Divê tavilê dawî li vê rewşê bê anîn.”
Demîray qala girtiyên nexweş ên li herêmê kir ku rewşa wan krîtîk e û got, “Li Girtîgeha Osmaniyeyê rewşa nexweşê dil Sabrî Kaya her giran dibe. Beriya çend hefteyan nameyek ji me re şand û diyar kir ku rewşa wî roj bi roj giran dibe. Ji bilî wî 21 girtiyên din ên nexweş li herêmê hene. Di nava wan de hin girtî hene ku piştî greva birçîbûnê nexweş ketine. Rewşa wan a tenduristiyê hîn baş nebûye. Di nava şert û mercên neyînî de ne.”
Demîray destnîşan kir ku girtiyên nexweş li Tirkiyeyê weke amûreke siyasî tên bikaranîn û got, “Ji ber vê yekê serlêdan tên redkirin. Ev rewş di çarçoveya mafên mirovan de nayê qebûlkirin.”
