Navenda Civaka Demokratîk a Kurd li Swêdê, kongreya xwe li paytext Stockholmê pêk anî. Di kongreyê de berxwedêrên rojiya mirinê û grevên birçîbûnê hate silavkirin.
Kongre li Navenda Perwerdeya Kar pêk hat û bi deqeyeke rêzgirtinê ji bo bîranîna şehîdên şoreşê dest pê kir.
KNK: GELÊ KURD WÊ BI SAYA BERXWEDANÊ BIBE XWEDÎ STATU
Bi navê KNK’ê Ahmet Karamûş li kongreyê axivî û bi bîr xist, destketiyên li çar parçeyên Kurdistanê bi saya têkoşîn û berxwedana şehîdan û Rêberê Gelê Kurd Abdullah Ocalan hatine afirandin.
Karamûş anî ziman, berxwedana gelê Kurd a li dijî tecrîdê girseyî û mezin dibe û got, “Bi saya berxwedanê wê gelê Kurd û Kurdistanê bibe xwedî statu.”
PARTIYA KESKAN: DEM HATIYE KU EWROPA LI DIJÎ SÛLTAN DERKEVE
Parlametnerê Ewropayê yê Partiya Keskan Bodil Valero jî zext û zordariya Erdogan û hikumeta AKP’ê rexne kir û Tirkiye weke sûltaniyê pênase kir. Valero got, “Dem hatiye ku Ewropa li dijî vî sûltanî derkeve.”
PARTIYA ÇEP: HETA BIDAWÎBÛNA TECRÎDÊ Û AZADIYA KURDISTANÊ WÊ TÊKOŞÎN BIDOME
Parlamenterê Partiya Çep Daniel Riazat jî ku ji bo bidawîbûna tecrîdê meha Sibatê 3 rojan di greva birçîbûnê de bû, anî ziman ku ew serbilind e ji ber ku bi Kurdistaniyan re têdikoşe. Riazat got, “Têkoşîna me wê heta bidawîbûna tecrîdê û azadiya Kurdistanê bidome.”
Piştî axaftin û xwendina peyaman, rêveberiya nû hate hilbijartin. Ridvan Altûn û Şukran Yeşîl ji bo hevserokatiya Navenda Civaka Demokratîk a Kurd (NCDK) a Swêdê hatin hilbijartin.
