Welatiyên Silêmaniyê bal kişandin li ser serketina berxwedana Kobanê û diyar kirin ku divê Kobanê bibe sembola yekîtiya neteweyî û gotin; “Eger Kurd yekgirtî bin wê bikarin li hemberî her coreyên êrîşan rawestin.”
1’ê Mijdarê çaremîn salvegera îlankirina 1’ê Mijdarê Roja Cîhanî ya Kobanê ye. Roja 13`ê Îlona 2014`an çeteyên DAIŞ’ê bi piştgiriya dewleta Tirk û bi çekên giran yên ku ji Başûrê Kurdistanê bi taybet jî ji Mûsil bidest xistibûn, êrîşî Kantona Kobanê ya Rojavayê Kurdistanê kirin. Li hemberî êrîşên dagirkeriyê şervanên YPG/YPJ’ê berxwedaneke dîrokî nîşandan û bi deh hezaran welatiyên sivîl veguhestin cihên bi ewle.
Piştî berxwedana 134 rojan di 26’ê Çileya sala 2016’an de ji aliyê şervanên YPG/YPJ’ê ve hemû Kobanê ji çeteyên DAIŞ’ê rizgar kirin.
Welatiyên Silêmaniyê li ser ruhê berxwedana Kobanê û girîngiya yekîtiya neteweyî ji ajansa me re axivîn.
Ciwan Îsmaîl, Kobanê weke sembola Kurdan bi nav kir û got; “Jinên gelek zîrek û berxwedêr têde bûn. Divê serkeftina Kobanê çavê hemû Kurdan veke ji bo parastina xaka Kurdistanê. Ji ber ku Kobanê beşeke ji Kurdistanê û divê tim li bira Kurdan be.”
Hewras Umêd jî berxwedana Kobanê ji bo Kurdan cihê serbilidiyê bi nav kir û got; “Berxwedana Kobanê wiha kir ku gelek gelên welatên din xwedî li Kobanê derkevin. Lewma bandoriya Kobanê li ser yekîtiya Kurdan heye.”
Hewras Umêd got ku divê Kobanê bibe sembola yekîtiya neweteweyî û got ku hemû Kurd li dijî dagirkeriya xaka Kurdistanê bibe xwedî helwest.
Herwiha Ehmed Ebdullah jî da zanîn ku Kobanê bûye sembola hemû cîhanê û wiha destnîşan kir; “Jin û mêrên li Kobanê bi berxwedan û zîrekiya xwe di karin ji bo rizgarkirina Kurdistanê alîkariya hemu Kurdistanê bikin. Ji ber ku welatparêzin bi cesaret in. Ger hemû Kurd yekgirtî bin û destê wan di destê hev de bin, dikarin li hember dijmin rawestin. Kobanê ji bo Kurdan bûye sembol û destkeftiyekî mezin.”
