Endamê Meclîsa Partiyê ya HDP’ê Dogan Erbaş diyar kir, daxuyaniya Serdozgeriya Komarê ya Bûrsayê ku îdîayên têkildarî Ocalan red kir, têrker nedît û got, “Divê bi lezgînî tecrîd bi dawî bibe û hevdîtin pêk were.”

Piştî ku îdîayên li ser tenduristiya Rêberê Gelê Kurd Abdullah Ocalan ketin rojevê, bala mirovan careke din çû ser bêhiqûqiya ku li Îmraliyê bi rêk û pêk tê kirin. Ji 27’ê Nîsana 2020’î û vir ve agahî ji Ocalan nayê girtin. Ji parêzerên Ocalan Dogan Erbaş, diyar kir ku daxuyaniya Serdozgeriya Komarê ya Bûrsayê têrê nake, divê tecrîd tavilê bê rakirin û hevdîtin bi muwekîlê wan re bê kirin.

‘ÎMRALI JI ALIYÊ HIQÛQÎ VE ÇALAREŞ E’ 

Endamê Meclîsa Partiyê ya HDP’ê Erbaş bûyerên dawî ji ajansa me re nirxand. Dogan Erbaş bal kişand ser îdîayên li ser medya dîjîtal tên kirin û got, “Rewşeke nediyar heye. Ev yek jî ji ber tecrîdê de ye.” Erbaş bi bîr xist ku li Îmraliyê rêveçûneke welê heye ku ji zelaliyê bêpar e, mekanîzmayên xwe yên hiqûqî nîne, li kontrolê girtî ye, hevdîtinên parêzeran û malbatan nayê kirin û destnîşan kir ku Îmrali bi vî rengî çalareşeke hiqûqî ye. Erbaş diyar kir, heta ku ev rewşa nediyar û tecrîd dewam bike, mixaibin wê îdîayên bi vî rengî jî belav bibin.

‘NEPÊKANE KU MIROV ÎDÎAYAN JINEDÎTÎ VE BÊN’

Erbaş anî ziman ku nepêkane ew van îdîayan cidî nebînin û got, “Em baş zanin ku desthilatdarî û wezîrên wê xwedî zîhniyet û pratîkeke çawa ne; em bi dijminatiya wan a li Kurdan zanin. 22 sal in pratîkeke Îmraliyê heye, em bi wê jî zanin. Lewma şaş e ku ev îdîa cidî neyê dîtin.”

Dogan Erbaş bal kişand ser daxuyaniya Serdozgeriya Komarê ya Bûrsayê ku gotibû, tenduristiya wî baş e û destnîşan kir ku ev daxuyanî têrê nake. Dogan Erbaş bi bîr xist, Wezîrê Edaletê Abdulhamît Gul beriya niha bi daxuyaniyekê ragihandibû ku astengiyên li pêşiya hevdîtinê hatiye rakirin, lê tevî vê yekê jî tecrîd bi rengekî kêfî dewam dike. Erbaş destnîşan kir yekane rêya ku dawî li fikar û gumanan bîne, çûyîna malbatê û parêzeran a ji bo Girava Îmraliyê ye û ragihand, ji bilî vê yekê ti daxuyanî wê têrker nebe.

‘TECRÎD VERSIYONA ROJANE YA DIJMINATIYA LI KURDAN E’

Erbaş diyar kir ku sedema bingehîn a israra di tecrîda Îmraliyê de, şêweyê siyaseta şer û neçareserkirina pirsgirêka Kurd e û got, “Sedemeke din a girîng jî ew e ku dixwazin nehêlin nêrînên Birêz Ocalan bi raya giştî re bên parvekirin. Lewma polîtîkaya tecrîdê, versiyona rojane ya dijminatiya dewletê ya li Kurdan e. Hikumet bên guhertin jî ji ber ku zîhniyet nayê guhertin, polîtîkaya tecrîdê dewam dike.”

‘DIVÊ DAXWAZÊN ÇALAKGERÊN GREVA BIRÇÎBÛNÊ BIBE DAXWAZÊN RAYA GIŞTÎ’

Dogan Erbaş greva birçîbûnê ya li girtîgehan a li dijî tecrîdê nirxand û anî ziman, ji ber ku rêyên qanûnî û rewa yên ji bo bidestxistina mafê xwe xitimîne, grevên birçîbûnê dest pê kirine û got, “Gelekî girîng e ku di vê demê de daxwazên mirovên di greva birçîbûnê de ne bibin daxwazên raya giştî. Ji bo bicihanîna van daxwazan divê rêyên dîplomatîk bên bikaranîn û têkoşîna demokratîk û rewa bê mezinkirin.”

‘NEWROZA 2013’AN FIRSENDEKE GIRÎNG BÛ’

Dogan Erbaş diyar kir ku Newroza 2021’ê bi rewşeke xitimî, bi rastiya welatekî ber bi kendêl ve tê dehfdan, pêşwazî dikin û anî ziman ku bi taybetî şirîkê biçûk ê desthilatdariyê temamiya welat dîl girtî ye. Erbaş ragihand ku Newroza 2013’an firsendeke girîng bû û destnîşan kir ku wê demê hêvî ji bo aştî û çareseriyê afirî bû. Erbaş got, di Newroza 2021’ê de gelê Kur û gelên Tirkiyeyê wê nerazîbûna xwe ya li dijî vê rewşa neçareseriyê, şer û tundiyê bînin ziman.

‘HETA TECRÎD BI DAWÎ NEBE NE AŞTÎ NE JÎ DEMOKRASÎ TÊ’

Erbaş destnîşan kir ku divê tecrîd tavilê bê rakirin, hevdîtin bê kirin û got, “Heta ku tecrîda li Îmraliyê bi dawî nebe, li Tirkiyeyê ne qala demokratîkbûnê, ne jî qala aştî û çareseriyê bê kirin. Di nava salên derbasbûyî de eşkere bû ku Birêz Ocalan di vê mijarê de aktorekî girîng û diyarker e. Di nava 22 salên derbasbûyî de ev yek gelek caran eşkere bû. Herî dawî di hevdîtina bi parêzeran re gotibû, ‘Eger hefteyekê bidin min ez ê karibim zemînê şer ji holê rakim’. Ev hêz û perspektîfa wî heye. Lê belê yên ku di şer û neçareseriyê de israr dikin, hîn jî polîtîkaya tecrîdê dimeşînin. Ji bo tecrîd tavilê bi dawî bibe, ev yek divê weke daxwazeke siyasî li desthilatdariyê bê ferzkirin.”