Daxuyaniya Navenda Ragihandin û Çapemeniyê ya HPG’ê bi vî rengî ye:

Roja 23’ê Hezîrana 2024’an li herêma Mawayê di şerê li dijî artêşa Tirk a dagirker û êrîşên hewayî de fermandara me ya hêja, jina bi wêrek a Mêrdînê, endama Fermandariya Eyaleta Gabarê Bêrîtan Nûrhak Çiya heta nefesa xwe ya dawî bi fedayî şer kir û şehîd bû.

HPG’ê di serî de malbata şehîd Bêrîtan ji gelê Kurd de sersaxî xwest û da zanîn ewê teqez xeyala avakirina Kurdistana azad pêkbînin.

Nasnama şehîd Bêrîtan Nûrheq Çiya wiha ye

Sultan Dag bi nasnav Bêrîtan Nûrhak Çiya, navê dayikê Fatma navê bav Recep li Mêrdînê ji dayik bû, 23’ê Hezîrana 2024’an li Botanê şehîd bû.

Li ser fermandar Bêrîtan Çiya Nurheq HPG’ê wiha got:

Li herêma Omeriya, navçeya Mêrdînê Mahsertê ji dayîk dibe, leheng û pêşenga çiyayî.

Ji malbateke li herêmê xwedî kok û çanda welatparêz e.

Çûnûhatina gerîla ya li gundê xwe dişopîne û ji wan bandor dibe.

Gerîlaya jin a pêşî dibîne jî Şehîd Hozan Mizgîn e.

Hingî soz dide ku rojekê bibe gerîla.

Dema gundê wê tê şewitandin, hê zarok e, pênç saliye, bavê wê ji aliyê dagirkeriya Tirk ve bi awayekî hovane tê êşkencekirin.

Bi hêrsa li hemberî dagirkeriya Tirk mezin dibe û vê sondê dixwe:

Ez ê rojekê weke gerîla vegerim gundê xwe û teqez tola bavê xwe û tevahî gelê xwe hilînim.

Ji ber şewitandina gund, malbata wê koçî Mêrdînê dike.

Dema dest bi dibistanên pergala Tirk dike, dibîne ku ew der navendên asîmîlasyonê ne.

Li milekî dibistanê dixwîne, li milê din ji bo parastina cewhera xwe berxwedaneke mezin dike.

Ji ber vê taybetmendiya xwe, hevalên wê pir jê hez dikin.

Piştî komploya navneteweyî û barkirina li metropolên Tirkiyê, pêvajoyeke zor û zehmet li pêşiya wê ye.

Lê ew vê zoriyê dixe sedema têkoşînê û demekê di xebatên ciwanên şoreşger de cihê xwe digire.

Timî gerîla dixwîne û dişopîne, xwe li pirtûkên têkildarî felsefeya Rêber Apo digire.

Cihê ku xwe lê azad dibîne timî çiyayên Kurdistanê ne.

Beşdariya birayê wê Xalit Dag bi nasnav Nûrheq a li refên gerîla, bandorek mezin lê dike.

Du caran hewl dide bibe gerîla, lê nikare vê daxwaza xwe bi ser bixe.

Sala 2002’ê armanca wê pêktê, diçe Wanê û li wir dibe gerîlayeke azadiya Kurdistanê.

Dema berê xwe dide Qendîlê, dibe yek ji wan milîtanên li dijî tasfiyekaran li ber xwe dide.

Bi kesayet û beşdariya xwe her tê hezkirin û mînak tê girtin.

Armanca wê ya sereke ew e, ku bibe gerîlayeke şareza ya YJA-Starê.

Ji bo vê ne tenê di warê leşkerî de, xwe di warê îdeolojîk de jî bi çek û rext dike.

Her roj dilsoziya xwe ya bi Rêber Apo re xurttir dike.

Di gelek xebatan de cih digire.

Piştî 4 salên li Qendîlê, li Akademiya Şehîd Bêrîtan û li Akademiya Leşkerî ya Mahsûm Korkmaz perwerdeyan dibîne.

Piştî perwerdê li Metîna 3 salan, li Zagrosan 2 salan bi wezîfeya fermandariyê radibe.

Li Zagrosan bi operasyonên şoreşgerî hêrsa xwe ya li dijî dagirkeriya Tirk nîşan dide.

Di gelek çalakiyan de cih digire, ku van çalakiyan li cîhanê deng vedan.

Birayê wê Nûrheq Çiya 2011’an şehîd dibe û ev jî ji bo wê dibe sedema mezinkirina têkoşînê.

Timî dixwaze biçe Bakurê Kurdistanê.

Ji bo vê pêşî li Akademiya Şehîd Zîlan a PAJK’ê beşdarî perwerdeyê dibe.

Paşê berê xwe dide herêma Heftanînê û 2 salan perwerdeyê dide hevalên xwe yên nû bûne gerîla.

Daxwaza çûyîna Bakurê Kurdistanê bi ser dixe û berê xwe dide herêma Gabarê.

Demekê li Kerboranê dimîne û di berxwedana xwerêveberiyê de dibe xwedî kedeke bêhempa.

Hem derbên giran li dijmin dixe û hem jî gel li gorî stratejiya Şerê Gel ê Şoreşgerî bi rêxistin dike.

Paşê vedigere Gabarê û ji wir jî berê xwe dide herêmên Parastî yên Medyayê

Piştî perwerdeya li Akademiya Hakî Karer, li Metîna berxwedana li dijî tevgera dagirkeriyê ya dewleta Tirk bi rêxistin dike.

Lê timî berê wê li Bakurê Kurdistanê ye û vê carê weke Endama Fermandariya Eyaleta Gabarê, vedigere Gabarê.

Bi xurtkirina dilsoziya Rêber Apo, dixwaze bibe bersiva demê.