Welatiyên li Şirnexê diyar kir ku li herêmên Şirnexê tîmên taybet ên artêşa Tirk, kincên gerîlla li xwe dikin û li herêmê digerin.
Li herêma Çiyayê Cûdî û Besta bê navber bi tevlîbûna tîmên taybet û cerdevanan operasyonên eskerî tên li darxistin.
Ji ber operasyonên zêde, welatî nikarin biçin kar û barê xwe yên li nava zeviyan bikin. Qereqolên herêmê bê navber çiya û zozanê herêmê bombe dike.
Operasyona dawî li herêma Navyan, Nerex, Kiron, Avgamasiya, Buryan û Bajaroka Gundikê Melê zêde bûye.
Welatiyên herêmê diyar kirin ku ji ber operasyonê nikarin biçin nava dahl û rezên xwe nikarin karên xwe yên rojane bikin.
Welatiyan anîn ziman ku di operasyonên dawî de dîsa wekî salên 1990’î tîmên taybet cilên Gerilla li xwe dikin û li herême digerin.
Welatiyan anîn ziman ku wekî tîmên taybet ên “Hançer” û “Bayrak” cilên HPG’iyan li xwe dikin û li herêmê digerin û derdikevin operasyanan.
Kontrayên Tîmên “Hançer” herî dawî di tîrmeha 2009’an de li Navçeya Elkê Necman Olmez (35) û Ferhat Ediş (35) kuştibûn.
