Li dijî xespkirina îradeya gelê Kurd ya li Wanê li hawîrdorê Tirkî û Kurdistanê çalakî hatin lidarxistin.
Yek ji van ciyan jî bajarê Îzmîrê bû.
Bi vê boneyê di 15’ê gulanê de bi ser gelek malan de hate girtin û 16 kes hatin binçavkirin.
Piştî karûbarên îfadegirtinê yên li emniyetê, duh sewqî edliyeyê hatin kirin.
Dadgehê derbarê 9 kesan de biryara girtinê da.
Kesên hatin girtin ev in:
Arda Duvarci, Azat Kunur, Nazîf Çakir, Nîlufer Yildiz, Samet Sagniç, Serdar Akturk, Selman Yagmagan, Sezgîn Zevkîbol û Serhat Çukurçam.
Şeş kes jî bi şertê kontrolê hatin berdan.
Partiyên siyasî û rêxistinên civaka sivîl piştî biryarê li pêşiya edliyeyê daxuyanî dan û biryar şermezar kirin
Di 16’ê gulanê de jî li navçeya Turgutlu ya Manîsayê 8 kes hatibûn binçavkirin.
Ji wan Hayrî Soylemez, Işik Soylemez û Ahmet Akan bi hinceta ku di wesayita xwe de strana “Bêrîtan” gohdar kirine hatin girtin.
5 kes jî bi şertê kontrola edlî hatin berdan.
Li Stenbolê 15’ê Gulanê bi ser malên endamê Meclîsa Partiyê ya Partiya Wekhevî û Demokrasiyê ya Gelan (DEM Partî) Unal Yûsûfoglû, rêveberên MATUHAYDER’ê û gelek endamên partiyê jî di nav de, bi giştî 20 kesan de hate girtin û bi îdîaya “di nava qada siyasî ya rêxistinê de cih digirin” hatin binçavkirin.
Ji 20 kesên binçavkirî, 10 kes piştî lêpirsînên dozgeriyê bi şertê kontrola edlî hatin berdan.
10 kes jî bi daxwaza girtinê sewqî Dadgeriya Sulh û Cezayê hatin kirin.
Ji van 10 kesan, 6 kes hatin girtin û 4 kes jî bi şertê kontrola edlî hatin berdan.
Navên kesên hatine girtin, ev in:
Alamettîn Demîr, Çetîn Demîr, Fîkrî Baş, Fîlîz Aydin, Îbrahîm Elban û Yaşar Gokdemîr.
