Li Sûdanê, ji bo rêveberî radestî sivîlan bê kirin tevgera gel li ber biryargeha leşkerî ya li paytexta Hartumê çalakî pêk anî. Lê belê leşkeran êrîşî çalakiyê kirin. Di êrîşê de 5 kes hatin kuştin.
Li gorî daxuyaniya Komîteya Doktoran a Sûdanî, ji ber êrîşa leşkeran a roja Duşemê ku li dijî çalakiya rûniştinê kirin, ji çalakgeran 5 kes bi fîşekan hatine kuştin.
Komîteyê ragihand, rewşa gelek birîndaran giran e û gelek ji wan divê bên emeliyatkirin.
Sefaretxaneya Dewletên Yekbûyî yên Emerîkayê ya Sûdanê daxuyaniyek weşand û xwest, dawî li destwerdana li gel bê anîn.
Sefaretxaneyê bi rêya Twitterê daxuyanî da û ji bo destwerdana hêzên ewlekariyê yên Sûdanî got, “Neheq e û divê bê rawestandin.” Sefaretxaneya Bilind ragihand ku Konseya Leşkerî ya li desthilatdariyê ye, ji êrîşê berpirsyar e.
Tifaqa Guhertin û Azadiyê ku pêşengiyê ji tevgera gel a li Sûdanê re dike, piştî êrîşa leşkerî bang kir ku li hemû bajar û gundan meşên aştiyane bên kirin û Konseya Leşkerî ji desthilatdariyê bê daxistin.
