Malbetên şehîdan ên Wargeha Şehîd Rûstem Cûdî tecrîda girankirî ya li ser Rêberê PKK’ê Abdullah Ocalan şermezar kirin.
Malbatên şehîdan ên Wargeha Şehîd Rûstem Cûdî (Mexmûr) duh êvarê li Saziya Malbatên Şehîdan a wargehê li dijî tecrîda girankirî ya li ser Rêberê PKK’ê Abdullah Ocalan daxuyaniyek dan çapemeniyê. Daxuyaniya çapemeniyê ji aliyê mamosta Silamet Erdogan ve ku hevserê wê şehide ve hate xwendin.
Daxuyanî ku bi deqeyek rêzgirtina ji bo giyanê şehîdên Kurdistanê destpê kir, wiha hate gotin; “Kesên ku rastiyên civakbûna mirovahiyê li ser dika dîroka mirovahiyê bi raya giştî re parve dikin şehîdin.Bi vê boneyê em weke malbat û hevjînên şehîdan ên ku li Wargeha Şehîd Rûstem Cûdî dijîn, vê rastiyê ji her kesê zêdetir dibînîn. Ji bo vê yekê pêwîste em weke hevjînên hevalên Şehîd vê heqîqetê ji her kesê bêhtir bi parêzin. Vê tecrîda girankirî ya li ser Rêbertiya xwe şermezar dikîn. Ji ber vê sedemê em hemû baş dizanin ku yekane rêya çareseriya tevayî pirsgirêkên Rojhilata Navîn û cîhanê, nexşerêya Rêbertiya me ye. Ji ber dewletên dagirker, bitaybet dewleta Tirk ji nexşerêya Rêbertiya me ditirse, ji ber vê çendê ketiye di nava hewldanên têkiliya Rêbertiya me bi cîhana derve, gelê Kurd û bitaybet bi Tevgera Azadiyê re qutbike.”
Di daxuyaniyê de bal hat kişandina li ser bi hevre bûna Rêbertî û gelê Kurd, wiha pê de çû: “Nêzî 40 sale ku gelê Kurd bi Rêbertî û Tevgera xwe re şerê hebûn û tinebûnê dide meşandin. Lêwra jî ne gengaze ku hêzên dagirker û xwînmijên gelê Kurdistanê bi karibin qutbûnê bêxin di nava gelê me û Rêbertiya me de. Em dubare dibêjin hêzên dagirker yên ku tecrita girankirî ya li ser Rêbertiya me dide meşandin, hun çiqasî hesabên qirêj bikin, em dest ji doza xwe bernadin, heta ku em bigihin azadiya Rêbertiya xwe.”
Di daxuyaniyê de bang li hêzên ku dibêjin em mafê mirovan diparêzin hat kirin û got: “Em bang li hêzên navnetewî û yên mafê mirovan bitaybet CPT dikin ku erka xwe ya li beramberî Rêbertiya me pêk bîne û tecrîda girankirî ya li ser Rêbertiya me bidin rawestandin.”
Daxuyanî bi dirûşma “Rêbertiya me hizir û baweriya me ye” û “Bimire hemû cûreyên tund û tûjiya li ser Rêbertiya me û gelê Kurdistanê” dawî bû.
