Hevserokê Partiya Yekîtiya Demokratîk PYD’ê Şahoz Hesen diyar kir ku ew bi partiyên ku berê di bin banê TEV-DEM’ê de bûn civiyane û rewşa dawî nirxandin.
Hevserokê PYD’ê Şahoz Hesen destnîşan kir ku hemû partî di civînên ku hatibûn lidarxistin de li ser girîngiya berdewamkirina xebata siyasî ya hevbeş li hev kirine û însîyatîfek avakirine. Hesen diyar kir ku em bi partiyên Kurd ên beşdarî Rêveberiya Xweseriya Demokratîk bûne re civiyane.
Hesen wiha dewam kir: “Hemû partiyan dan xuyakirin ku li hember buyer û pêşketinên ku li herêmê diqewimin hewcedariya wan bi biryar, însîyatîf û hevbeşiya nêrînê heye.
Şahoz Hesen diyar kir ku hêjmara partiyên ji derveyî rêveberiya xweser hindik in û got, “ji bilî Partiyên Encûmena Niştîmanî ya Kurd deriyên wan ji hemûyan re vekiriye. Hesen wiha got: “Dikarin tev li însiyatifê bin lê divê helwesta xwe li dijî dagirkeriya dewleta Tirk ya li Efrînê zelal bikin. Endamên ENKS’ê gelek caran di êrîşên li ser Efrînê de cih girtine û ev yek jî rê li ber nerazîbûna gel û partiyên siyasî vekiriye û hatiye şermezar kirin.”
Şahoz Hesen li ser armanca hevdîtinên wan bi partiyên din re wiha got: “Armanc me, avakirina çarçoveyeke siyasî ya kurdî a hevbeş e. Hemû partiyên kurdî yên Rojava ji bilî partiyê ENKS`ê beriya vê, însiyatîfa hevbeş ya `Nexşeya Rê` mohr kiribûn. Em dikarin sûd ji vê nexşeyê bigirin, em dikarin wê weke kevira bingehîn a têghiştina bi hev re bihesbînin.”
Di dawiyê de hevserokê Partiya Yekîtiya Demokratîk PYD’ê Şahoz Hesen destnîşan kir ku tu astengî li pêş însiyatîfa wan derneketiye û got, “Dibe ku hin nêrînên partiyên siyasî yên cuda hebin lê ji bo berjewendiyên giştî yekîtî û piştgirî ferz e.”
