Ji fermandarên YJA Starê Şerda Mazlûm Gabar li ser Pêngava 1’ê Hezîranê ji ANF’ê re axivî.

Fermandara YJA-Star Şerda Mazlum Gabar, anî ziman ku bi Pêvajoya 1’ê Hezîranê re ji bo hêzên êşkencekar û komploker bersiva pêwîst hatiye dayîn û bi bîr xist ku di wê demê de dihat xwestin Tevgera Azadiyê bi temamî were tasfiyekirin. Armanca êrîşê herî zêde jî xeta jiyana azad bû.

Şerda got:

Mîna ku tê zanîn dîroka PKK’ê xwedî cewhereke, koka wê kûr e û hin rastî û pîvanên PKK’ê ti carî, di nava her şert û mercî de neguherin. PKK tevgereke sosyalîst e û divê de israr dike, ji ber vê jî dibe ku di rêbaza şer de guhertin çêbibe, lê belê di şêwaza jiyanê ya PKK’ê de ti guhertin çênabe.

Li ser encamên Pêngava 1’ê Hezîranê jî Şerda anî ziman ku çi dibe bila bibe PKK wê ji cewhera xwe dûr nekeve û got:

Yek ji encamên girîng ên pêngavê vegera li qadên Bakurê Kurdistanê çêbû. Di sala 1999’an de di dema vekişînê de hin qad hatibûn valakirin. Di wê demê de ew valahî cardin hate tijîkirin. Lê belê encama herî girîng a vê pêvajoyê şerê gel ê şoreşgerî bû.

Ev qonaxeke nû ya şerê me bû. Li Xakurkê, Şemzînan, xeta Zagrosê, Rindîkê, Şitaza, Oremarê çalakiyên mezin hatin pêkanîn. Li Botanê pêngava Beytûşebapê pêk hat. Bi giştî şer û têkoşîn li tevahiya Kurdistanê belav bû. Ev pêngav bû sedem ku dijminê dagirker hejandineke cidî bijî

Şerda Mazlum li ser rewşa dawî ya şer jî ev nirxandin kir:

Em tenê li dijî dewleta Tirk a dagirker şer nakin, di heman demê de li dijî hêzên hegemonîk ên cîhanê jî têdikoşin.

Îro navenda şer Îmralî ye. Li Îmraliyê têkoşîneke pir dijwar û êrîşeke pir mezin heye.
Di heman demê de pêşî li Herêmên Parastinê yên Medyayê li Kurdistanê li dijî Tevger, gel û Rêbertiya me konsepta şer û tasfiyeyeke topyekûn tê meşandin.

Ev 4 sal in gerîla li dijî teknîka NATO’yê, leşkerên pispor, çekên nukleerî û kîmyewî li tunelên şer ên li Kurdistanê şerekî bêhempa dimeşînin. Îro gerîla temînata jiyana azad a herêmê û azadiya gelê Kurd e.

Eger êrîşek li dijî gel û Rêbertiya me hebe, gerîla amade ye pêşî li vê bigire û tolê hilîne. Ev êrîş bi armanca şikandina îradeya gelê me pêk tên, lê belê hevrêyên me Rojhat, Erdal, Andok, Serxwebûn, Ekîn, Rûken, Sara, Serhed Giravî, Botan, Zinarîn û Şoreş Karer ev êrîş vala derxistin.

Ev 3 sal in dijmin li herêma Zap, Amediyê û qadên Şehîd Delîl a Zagrosê xitimiye û derbên pir giran xwariye û hê jî dixwe.

Ev xeta fedaî ya Rêber Apo ye. Heta niha gerîla li ser bingeha vê xetê şer kir û wê li ser vê xetê serketin bê qezenckirin.