Şandeyekî Koma Tevgera Goran a li Parlamentoya Herêma Kurdistanê îro li Hewlêrê serdana greva birçîbûnê ya li Nûnertiya HDP’ê kir û piştgirî da çalakgerên di greva birçîbûnê de. Şandeyê bang li Tirkiyeyê kir ku dest bi pêvajoya aştiyê bike.
Li Nûnertiya HDP’ê ya Hewlêrê çalakiya greva birçîbûnê ya li dijî tecrîda li ser Rêberê PKK’ê Abdullah Ocalan di roja 99’an de berdewam dike. Îro Şandeyekî Koma Tevgera Goran a li Parlamentoya Herêma Kurdistanê serdana çalakgeran kir û piştgirî dan çalakgeran.
Şandeya Tevgera Goran ji parlamenter Belên Îsmaîl, Goran Înzîbat û Diktor Şayen Eskerî pêk dihat.
Cîgirê serokê Koma Tevgera Goran ya li Parlamentoya Herêma Kurdistanê Belên Îsmaîl ji Rojnews’ê re axivî û got; “Em ji bo ji rewşa tendirustiya Nasir Yagiz û tevahiya çalakgerên din agadar bibin hatine navenda HDP’ê. Em piştgiriya xwe ya ji bo çalakgeran dubare dikin. Li Parlamentoya Kurdistanê ji bo çalakgeran tişta dikeve li ser milê me emê bikin.”
Belên Îsmaîl diyar kir ku divê çareke din pêvajoya aştiyê li Bakurê Kurdistanê û Tirkiyeyê destpê bike û got; “Divê ji bo rewşa Bakurê Kurdistanê ya niha heyî baştir bibe pêvajoya aştiyê destpê bike. Emê bi hemû awayî bibin alîkar. Ew karên nerawa yên dewleta Tirk li hemberî Kudên Bakur dikin li hemberî parçeyên din ên Kurdistanê jî dike. Divê pirsgirêkên xwe bi riya guftûgoyê çareser bikin. Weke hemû welatiyên vê cîhanê mafê me heye. Divê ji aliyê ti welatan ve mafên me neyên binpêkirin.”
