Xizmên girtiyan yên Edenê û parlamenterên DEM Partî, Newroz Uysal Aslan û Perîhan Koca, doh çûne Wezareta Dadê.
Lê polîsan nehiştin xizmên girtiyan ji wesayîtên xwe paya bibin.
Xizmên girtiyan jî bi tililî û dirûşmeyan helwesta polîsan protesto kirin.
Polîsan nehiştin rojnamevan jî dîmenan bikişînin û hinek rojnamevan jî derb kirin.
Xizmên girtiyan jî bi dirûşmeya “Zext nikarin me têk bibin” çalekiya xwe domandin û li pêşiya Wezareta Dadê daxuyaniyek dan.
Di destpêkê de parlamentera DEM Partiyê Newroz Uysal Aslan axivî û got;
Dayik dixwazin bi Wezîrê Dadê re hevdîtinê bikin û dengê girtiyan bi wezîr re bidin bihîstin.
Lewma ji her devera Tirkiyê dayik tên ber deriyê Wezareta Dadê.
Vê hefteyê jî dayikên ji Edenê hatin, lê polîs dayikan asteng dikin.
Piştre jî ji xizmên girtiyan Şemse Bagdu axivî û got:
Divê tecrîda li ser birêz Ocalan êdî bi dawî bibe.
Heta ku rêber Apo azad nebe tu kes nikare azad bibe.
Kilîda aştiyê, li Îmraliyê ye.
Dayika Şemse destnîşan kir ku ew, dayikên aştiyê ne û got;
Em bangî wezîr û serokkomar dikin û daxwaza aştiyê bikin.
Bila dengê min bigihije Wezîrê Dadê û Erdogan.
Ciwanên dimirin, ne zarokên Erdogan û Wezîrê Dadê ne, yên gel in.
Ji xizmên girtiyan Ayşe Elegaş jî axivî û da zanîn ku ji bo rakirina tecrîda li ser Rêber Abdullah Ocalan hatine pêşiya wezaretê û got;
Zêdetirî 40 mehan e ku ji Rêbertî tu agahî nayê girtin.
Em edalet û aramiyê dixwazin û naxwazin xwîn were rijandin.
Zarokên me tiştek nekirine û di girtîgehan de tên girtin.
Em polîtîkaya tecrîdê şermezar dikin.
